നൂറ്റാണ്ടുകളുടെ ചരിത്രവും പാരമ്പര്യവും പൈതൃകവും കാത്തുസൂക്ഷിക്കുന്ന പടിഞ്ഞാറേക്കുറ്റ് കുടുംബത്തിന്റെ ചരിത്രം ഇന്നത്തെ പുതുതലമുറയ്ക്ക് സംലഭ്യമാകുവാൻ കാലയവനികയുടെ തങ്കലിപികളിൽ ഒരു കണ്ണിപോലും അറ്റുപോകാതെ ഒരുമിച്ച് ചേർത്ത് പരിചയപ്പെടുത്തി കൊടുക്കുവാൻ ഏറെ ത്യാഗങ്ങൾ സഹിച്ച നമ്മുടെ കുടുംബാംഗങ്ങളെ പ്രത്യേകം ഓർക്കേണ്ടതാണ്.

 അതിൽ കൃതജ്ഞതയോടെ ആദ്യമായി നാം സ്മരിക്കേണ്ടത് പടിഞ്ഞാറേക്കുറ്റ് പൈലി മകൻ ആഗസ്തി എന്ന പാപ്പച്ചനെയാണ്. 1956 നെയ്ശ്ശേരി വീരാപിള്ളിത്തണ്ട് എന്ന സ്ഥലത്തുനിന്നും കണ്ണൂർ ജില്ലയിലെ തളിപ്പറമ്പ് താലൂക്കിൽ നടുവിൽ പഞ്ചായത്തിലെ മണ്ഡളം എന്ന സ്ഥലത്ത് താമസമാക്കിയ ഒരു സാധാരണ കർഷകനായിരുന്നു ശ്രീ. പാപ്പച്ചൻ. തന്റെ എല്ലാ പരിമിതികളെയും അതിജീവിച്ച് തീക്ഷ്ണതയോടെ ഈ വൻ കുടുംബവൃക്ഷത്തിലെ 95 ശതമാനം കുടുംബങ്ങളും സന്ദർശിച്ച് വിവരങ്ങൾ ശേഖരിച്ച് 250 വർഷത്തെ ഒരു കുടുംബ ചരിത്രം തയ്യാറാക്കുവാൻ അദ്ദേഹം കാണിച്ച സന്നദ്ധതയും കുടുംബത്തോടുള്ള സ്നേഹവും ഏറെ പ്രശംസനീയം തന്നെയാണ്. പടിഞ്ഞാറേക്കുറ്റ് കുടുംബത്തിന്റെ കുതിപ്പും കിതപ്പും വളർച്ചയും ഫലം ചൂടലും ഈ ഇന്റർനെറ്റ് ലോകത്തിന്റെ വിവിധ കോണുകളിൽ ഇരുന്നു നാം അറിയുകയും അനുഭവിക്കുകയും ആസ്വദിക്കുകയും ചെയ്യുന്നുണ്ടെങ്കിൽ, ചരിത്ര വഴികളിൽ കാലഹരണപ്പെട്ടേക്കാമായിരുന്നു ആ വഴിക്കല്ലുകൾ നമ്മളിലേക്ക് എത്തിക്കാൻ ഏറ്റവുമധികം പരിശ്രമിക്കുകയും കുടുംബ ചരിത്രത്തിന്റെ ആദ്യ കൈഎഴുത്തുപ്രതി തയ്യാറാക്കുകയും ചെയ്ത ശ്രീ പാപ്പച്ചൻ പടിഞ്ഞാറേക്കുറ്റിനാണ് അതിന്റെ അഭിനന്ദനവും കൃതജ്ഞതയും ഏറ്റവും അധികം അർഹിക്കുന്നത്. 2007 സെപ്റ്റംബർ മാസം മൂന്നാം തീയതി നിത്യസമ്മാനത്തിനായി വിളിക്കപ്പെട്ട ശ്രീ പാപ്പച്ചന്റെ ആത്മാവിന് പടിഞ്ഞാറേക്കുറ്റ് കുടുംബത്തിന്റെ ആദരാഞ്ജലികൾ.